Prosiect Argae Parc y Rhath

Pwy sy’n gyfrifol am gynnal a chadw Argae Parc y Rhath?

Mae Cyngor Caerdydd yn gyfreithiol gyfrifol am gynnal a chadw Argae Parc y Rhath, sy’n eiddo cyhoeddus, ac mae angen archwiliadau rheolaidd dan Ddeddf Cronfeydd Dŵr (1975).

A fydd yn rhaid cau’r parc?

Bydd angen cau gwahanol rannau o’r parc ger yr argae yn ystod y gwaith ymchwilio i’r ddaear a’r camau adeiladu. Caiff yr holl gyfnodau y bydd yr argae ar gau eu cynllunio a rhoddir gwybod amdanynt i randdeiliaid cymunedol a thrigolion lleol ymlaen llaw.  Ceir diweddariadau rheolaidd ar sianeli cyfryngau cymdeithasol Cyngor Caerdydd. Os bydd newidiadau’n codi oherwydd amgylchiadau annisgwyl, rhoddir gwybod am y newidiadau hyn cyn gynted â phosibl.

A fydd ardal chwarae’r plant ar gau?

Ar gyfer y gwaith adeiladu yn y dyfodol, byddwn yn ceisio cadw’r parc ar agor cymaint â phosibl, ond mae’n debygol y bydd rhywfaint o waith cau yn digwydd ar yr ardal chwarae. Fel rhan o’r gwaith dylunio parhaus rydym yn adolygu’r effaith bosibl ar yr ardal chwarae.

Pryd mae’r gwaith gwella i fod i ddechrau?

Ar hyn o bryd rydym yn datblygu’r dyluniad ac yn paratoi cais cynllunio ar gyfer y gwaith gwella. Bydd ymgynghoriad cyn ymgeisio cyn cyflwyno’r cais cynllunio. Bydd dyddiad dechrau’r gwaith adeiladu yn cael ei rannu ymlaen llaw pan fydd yn hysbys.

Faint o amser fydd y gwaith yn ei gymryd?

Yn amodol ar ganiatâd cynllunio, mae disgwyl i’r gwaith bara 12-18 mis.

Beth fydd yr oriau gwaith yn ystod y gwaith adeiladu?

Caiff diwrnodau ac oriau gwaith y safle eu penderfynu pan fydd contractwr yn cael ei benodi.

A fydd y gwaith yn effeithio ar oleudy Parc y Rhath?

Nid oes unrhyw waith adeiladu wedi’i gynllunio yng nghyffiniau’r goleudy. Bydd y gwaith adeiladu yn canolbwyntio ar y promenâd a’r gorlifan.

A fydd angen cau Heol Orllewinol y Llyn neu Heol Ddwyreiniol y Llyn er mwyn gwneud y gwaith?

Ar hyn o bryd, nid ydym yn rhagweld y bydd angen cau Heol Orllewinol y Llyn nac Heol Ddwyreiniol y Llyn.

A fydd angen mesurau rheoli traffig yn naill ai Heol Orllewinol y Llyn neu Heol Ddwyreiniol y Llyn wrth i’r gwaith gael ei wneud?

Mae’n debygol y bydd angen mesurau rheoli traffig ar adegau. Gan y bydd angen i draffig adeiladu a cherbydau dosbarthu fynd i mewn i’r parc a’i adael, efallai y bydd angen mesurau rheoli traffig er mwyn sicrhau diogelwch defnyddwyr y parc, y cyhoedd a staff adeiladu.

A fydd y parc yn cael ei gloi yn y nos?

Bydd mannau gwaith yn cael eu ffensio er diogelwch. Efallai y bydd angen cloi’r gatiau dros nos dros dro, ac os felly byddwn yn darparu manylion pan fyddant ar gael.

Beth allai’r effeithiau ar fywyd gwyllt a choed lleol fod?

Bydd yr effeithiau ar fywyd gwyllt a choed lleol yn cael eu lleihau cymaint â phosibl. Mae ecolegwyr eisoes wedi cynnal rhai arolygon a bydd arolygon pellach yn cael eu cynnal wrth i’r cynllun fynd rhagddo a thrwy gydol y gwaith adeiladu. Bydd cynllun rheoli amgylcheddol yn cael ei ddatblygu gan y contractwr ar gyfer y cyfnod adeiladu. Bydd mesurau lliniaru’n cael eu hystyried fel rhan o’r datblygiad dylunio; er enghraifft, caiff tramwyfa llysywod ei chynnwys yn rhan o’r gorlifan. Mae’n debygol y bydd angen gwaredu rhai coed. Os bydd unrhyw golledion coed, bydd y nifer newydd a blannir yn yr ardal leol yn fwy na’r nifer a gollir. Mae’n bosib na fydd modd ail-blannu coed yn eu lleoliad gwreiddiol oherwydd y cynnydd yn ôl troed y gorlifan a gofynion diogelwch yr argae.

A fydd y gwaith yn golygu bod uchder y dŵr yn y llyn yn cynyddu?

Nid oes bwriad i newid lefel na maint presennol y llyn. Mae lefel y dŵr yn cael ei osod gan y gored. Bydd cyfnodau sych hir yn peri i’r lefel ostwng; bydd glaw trwm a stormydd yn gwneud iddi godi.

A fydd ansawdd y dŵr yn cael ei brofi ar gyfer iechyd a diogelwch?

Bydd profion dŵr yn cael eu cynnal yn ystod y cam adeiladu at ddibenion iechyd a diogelwch ac ar gyfer diogelwch amgylcheddol a rheoli llygredd.

A fydd y dirwedd yn newid o ganlyniad i’r gwaith?

Y bwriad yw gwneud cyn lleied o newidiadau â phosibl i’r dirwedd.

A fydd unrhyw welliannau i fioamrywiaeth lleol?

Gweithredir mesurau lliniaru ar gyfer unrhyw fioamrywiaeth pwysig y terfir arni. Nid yw gwelliannau posibl wedi’u trafod eto.

Pa led a hyd fydd y gorlifan newydd?

Am fanylion dyluniad arfaethedig y gorlifan, gweler ein deunydd ymgysylltu diweddaraf.

A gaiff uchder yr argae ei chodi?

Nid ydym yn bwriadu codi uchder yr argae.

A fydd yr argae yn cael ei wneud yn ehangach?

Nid ydym yn bwriadu gwneud yr argae yn ehangach na newid ei siâp cyffredinol.

Sut a phryd yr ymgysylltir â chymunedau lleol a rhanddeiliaid?

Cynhaliwyd cam cyntaf o ymgysylltu ym mis Hydref 2021 a dyma gyflwyno’r cynllun i’r gymuned cyn i’r gwaith ymchwilio tir ddigwydd ym mis Tachwedd 2021.

Cynhaliwyd ail gam ymgysylltu ym mis Rhagfyr 2022 a dyma gyflwyno’r opsiwn a ffefrir i’r gymuned. Gellir gweld deunydd o’r ymgysylltiad hwn ar-lein.

Rydym wedi ymrwymo i weithio gyda’r gymuned leol i sicrhau eu bod yn deall y gwaith fydd ei angen. Bydd ymgynghoriad cyn ymgeisio cyn cyflwyno’r cais cynllunio, er mwyn rhoi cyfle i’r gymuned a rhanddeiliaid roi adborth ar y cynigion.

Sut bydd y gymuned a rhanddeiliaid yn cael adborth ac yn cael gwybod am gynnydd y prosiect?

Os oes gennych unrhyw ymholiadau neu os ydych angen mwy o wybodaeth am y prosiect, cysylltwch â thîm y prosiect dros y ffôn, 02920 130 061, neu e-bostiwch roathparkdam@grasshopper-comms.co.uk

Bydd diweddariadau’n cael eu cyhoeddi ar sianeli cyfryngau cymdeithasol Cyngor Caerdydd a’r wefan hon, yn ogystal â chyhoeddi cylchlythyr diweddariadau i’r rhai sy’n byw yn agos at y safle.

Pwy yr ymgynghorir â nhw am y prosiect?

Rydym wedi cynnal ymarfer mapio rhanddeiliaid helaeth sy’n nodi rhanddeiliaid allweddol yn y gymuned y dylid ymgysylltu â nhw.

Mae parth ymgynghori graidd wedi’i ddiffinio gyda 4831 o aelwydydd a 59 o fusnesau ar y strydoedd o amgylch Parc y Rhath a’r tir hamdden.

Mae Grasshopper Communications yn arwain ymgysylltiadau â rhanddeiliaid rhanbarthol a lleol gan gynnwys y sectorau canlynol: treftadaeth, hamdden ac awyr agored, ffydd, gwasanaethau cyhoeddus, cyfleustodau a seilwaith, yr amgylchedd a chynaliadwyedd, twristiaeth a datblygu economaidd, addysg bellach a phrifysgolion, trafnidiaeth, busnesau lleol, cyfleusterau cymunedol, ysgolion, grwpiau cymunedol a chydraddoldeb.

Mae Cyngor Caerdydd yn arwain ymgysylltiadau â rhanddeiliaid gwleidyddol gan gynnwys Aelodau Senedd y DU, Aelodau Senedd Cymru a chynghorwyr wardiau.

Defnyddir datganiadau i’r wasg, ymgyrch cyfryngau cymdeithasol a phosteri yn y parc i hysbysu cymuned ehangach Caerdydd a’r tu hwnt.

Sut caiff barn y gymuned a rhanddeiliaid ei hystyried?

Rydym yn croesawu adborth am y prosiect a byddwn yn ceisio mynd i’r afael â materion sy’n codi. Bydd yr adborth a gyflwynir yn cael ei ystyried cyn cyflwyno’r caniatâd cynllunio.

A fyddwch yn cynnal ymyl y llyn fel rhan o’r gwaith?

Nid yw hyn yng nghylch gwaith y prosiect. Os hoffech drafod cynnal a chadw’r parc anfonwch e-bost atom yn parciau@caerdydd.gov.uk.

A fydd ochrau cerrig y nant sydd i’r de o’r gorlifan yn cael eu cynnal fel rhan o’r gwaith?

Gellir gwneud atgyweiriadau o amgylch pen isaf y gorlifan tuag at y cwrs dŵr naturiol. Mae unrhyw beth pellach i lawr yr afon o’r pwynt hwn y tu allan i gylch gwaith y cynllun hwn.

A fydd y gwaith yn cynnwys llusgrwydo ymhellach i lawr yr afon ger Gerddi Waterloo?

Nid oes unrhyw gynlluniau i wneud hyn fel rhan o’r cynllun hwn.

A fydd gwaith yn cael ei wneud i fyny’r afon o’r llyn neu ar y gorlifan?

Nid yw cyfleoedd i deneuo llifau i fyny’r afon wedi profi’n addas ac nid ydynt yn cael eu datblygu.

A fydd perygl llifogydd yn yr ardal yn cael ei effeithio gan y gwaith arfaethedig?

Prif nod y cynllun yw gwneud y gwelliannau angenrheidiol er mwyn sicrhau bod llifogydd eithafol yn cael pasio drwy’r argae’n ddiogel. Mae’n canolbwyntio ar ddiogelwch yr argae a’r boblogaeth i lawr yr afon, a’r cwmpas yw peidio â lleihau’r risg o lifogydd i lawr yr afon.

Yn rhan o’r cais cynllunio, bydd angen llunio Asesiad o Ganlyniadau Llifogydd (AGLl). Yn rhan o broses ymgeisio’r AGLl, bydd angen i nid ddangos y byddem yn gallu rheoli unrhyw effeithiau ar lifogydd i lawr yr afon o ganlyniad i waith gwella’r argae. Mae’r dyluniad yn cael ei ddatblygu yn unol â gofynion TAN15, sef nodyn cyngor technegol y Llywodraeth ar gyfer datblygu a pherygl o lifogydd.

Beth yw’r effeithiau ar y cronfeydd dŵr i fyny’r afon (h.y. Llanisien a Llys-faen)?

Mae cronfeydd dŵr Llanisien a Llys-faen yn gronfeydd nad ydynt yn cronni ac ni fydd y gwaith yn effeithio arnynt.

Beth yw effeithiau hirdymor y newid yn yr hinsawdd yn yr ardal?

Bydd y newid yn yr hinsawdd yn cael effaith sylweddol ar lifogydd yng Nghymru.  Mae stormydd yn debygol o ddigwydd yn amlach ac o fod yn fwy difrifol, a fyddai’n gofyn i orlifan yr argae pasio llifogydd eithafol yn ddiogel.

A yw’r argae yn strwythurol ddiogel?

Ydy, nid oes unrhyw bryderon ynghylch sefydlogrwydd yr argae.

Ble mae ffynhonnell Nant Fawr a ble mae’n dod i ben?

Mae Nant Fawr yn dechrau ychydig i’r gogledd o’r M4 uwchben Caerdydd ac yn llifo i Nant Lleucu, yna i mewn i Afon Rhymni, cyn llifo i Aber Afon Hafren.

Beth yw Deddf Cronfeydd Dŵr (1975)?

Rheoleiddir cronfeydd dŵr yng Nghymru a Lloegr dan Ddeddf Cronfeydd Dŵr (1975), a orfodir gan Gyfoeth Naturiol Cymru yng Nghymru. Mae’r Ddeddf yn bodoli i ddiogelu’r cyhoedd trwy leihau’r risg o ddŵr yn cael ei ryddhau heb reolaeth o gronfeydd dŵr mawr, wedi’u codi a’r llifogydd peryglus y gall hyn eu hachosi.

Pam mae angen i ni reoli perygl llifogydd a diogelwch argaeau?

Mae Parc y Rhath yn fan cyhoeddus sy’n cael ei ddefnyddio’n helaeth. Mae gwneud gwaith gwella yn sicrhau diogelwch yr argae ac yn lleihau’r perygl o lifogydd o doriad heb reolaeth. Bydd rheoli perygl llifogydd yn sicrhau effeithiolrwydd yr argae yn y dyfodol, gan ddiogelu bywydau a bywoliaethau o ganlyniad, a sicrhau y gall cenedlaethau’r dyfodol fwynhau un o barciau mwyaf poblogaidd Caerdydd yn ddiogel.

Pwy sy’n gyfrifol am reoli diogelwch yr argae?

Mae Cyngor Caerdydd yn gyfrifol am gynnal a chadw’r argae ac mae’n ofynnol iddo ymgymryd ag archwiliadau rheolaidd o’r argae a’r gorlifan (o dan Ddeddf Cronfeydd Dŵr 1975).

Beth fydd yn digwydd os na fydd y gwaith gwella i’r argae yn cael ei wneud?

Diben y gwaith yw gwella gallu’r gronfa ddŵr i hwyluso llif diogel dŵr llifogydd trwyddi ac atal dŵr rhag cael ei ryddhau heb reolaeth a allai beryglu’r rheiny i lawr yr afon. Os na wneir y gwaith, mewn digwyddiad llifogydd eithafol gallai fod difrod i’r argae gan achosi i ddŵr y llyn gael ei ryddhau a hefyd lifogydd sylweddol cynyddol mewn ardaloedd i lawr yr afon.

A ddyluniwyd Llyn Parc y Rhath i’w defnyddio ar gyfer dŵr yfed?

Adeiladwyd y gronfa ddŵr i fod yn amwynder, nid ar gyfer cyflenwad dŵr, ac nid yw’r dŵr erioed wedi’i dynnu ohoni at ddiben yfed.